Það sem af er ári hafa 113 manns verið myrtir í Cancún í Mexíkó. Flest morðanna tengjast fíkniefnaheiminum í borginni en lögreglan óttast að morðaldan muni færast nær ferðamönnunum í borginni en þeir eru mikilvæg tekjulind og því er mikið lagt upp úr að vernda þá. Hámarki morðöldunnar, að minnsta kosti til þessa, var náð þann 4. apríl þegar 14 manns voru skotnir til bana á aðeins 36 klukkustundum.

Yfirvöld óttast að morðaldan muni hafa neikvæð áhrif á ferðamannaiðnaðinn og íbúar borgarinnar hafa miklar áhyggjur af ástandinu enda mun það hafa mjög slæm áhrif ef ferðamenn hætta að koma til borgarinnar. Flest morðanna eru óleyst og sífellt fleiri ferðamenn heyra um þessa morðöldu.

Bandaríska utanríkisráðuneytið hefur hækkað viðvörunarstig sitt fyrir Quintana Roo héraðið, þar sem Cancún er, frá því sem áður var og hvetur fólk til að sýna varkárni en hefur ekki gengið svo langt að ráða fólki frá ferðum til Cancún.

USA Today segir að tæplega 30.000 manns hafi fallið fyrir morðingjahendi í Mexíkó á síðasta ári. Á fyrstu tveimur mánuðum 2018 hækkaði morðtíðnin í landinum 21 prósent frá sama tíma 2017.