Vinstri græn mælast með mest fylgi íslenskra flokka í nýrri könnun MMR, mælast Vinstri grænir með 27% fylgi sem er sama fylgi og flokkurinn mældist með í síðustu könnun. Sjálfstæðisflokkurinn mælist sem fyrr næst stærsti flokkurinn með 24,4% fylgi í könnuninni sem var gerð dagana 10. til 15. febrúar. Þó skal hafa í huga að munurinn milli flokkanna er innan vikmarka og því ekki hægt að fullyrða hvor flokkurinn nýtur meira fylgis þjóðarinnar.

Fylgi Pírata minnkaði um 1,7% milli mælinga og mælist nú 11,9%. Framsóknarflokkurinn og Samfylkingin sækja í sig veðrið og mælast flokkarnir með 10,7% og 10% fylgi, sem er eilítið meira en í síðustu könnun sem var gerð í byrjun mánaðarins.

Fylgi Viðreisnar mældist nú 6,2% og mældist 5,6% í síðustu könnun, Björt framtíð mælist nú með 5,4%, sama fylgi og í síðustu könnun. Stuðningur við ríkisstjórnina mældist 34,9%. Fylgi annarra flokka mældist 4,3% samanlagt, af þeim mældist Flokkur fólksins með 2,6% fylgi.

Alls voru spurðir 904 einstaklingar, 18 ára og eldri, valdir af handahófi úr þjóðskrá.