Í fréttatilkynningu frá Forsætisráðuneytinu kemur fram að þjóðaröryggisráð hafi fundað í dag í fyrsta skipti. Þetta er í samræmi við lög sem samþykkt voru á Alþingi í september á síðasta ári og tóku gildi í sama mánuði. Verkefni ráðsins er að framfylgja þjóðaröryggistefnu Íslands eins og hún liggur fyrir á hverjum tíma, standa fyrir reglulegri endurskoðun á þeirri stefnu og „að stefnan sé endurskoðuð reglulega og að viðeigandi samráð stjórnsýsluaðila innbyrðis og við Alþingi eigi sér farveg og fari reglulega fram“ eins og segir í fréttatilkynningu.

Stofnun ráðsins er liður í þeirri viðleitni stjórnvalda að styrkja samhæfingu og komi sú staða upp að þjóðaröryggi sé ógnað, að sjá til þess að viðbrögð þeirra viðbragðsaðila sem hlut eiga að máli séu samhæfð.

Verkefni þjóðaröryggisráðs eru viðamikil og ég bind miklar vonir við störf þess. Við sjáum hér tækifæri til þess að skerpa boðleiðir, skilgreina verkaskiptingu enn betur og gera samstarfið enn skilvirkara. Þá blasir við að samvinna þjóðaröryggisráðs og almannavarna- og öryggismálaráðs er afskaplega mikilvæg, þar sem störf þeirar skarast í mörgum tilvikum,

segir Bjarni Benediktsson forsætisráðherra en hann er jafn framt formaður ráðsins og stýrir fundum þess.

Í þjóðaröryggisráði sitja 11 fulltrúar. Auk forsætisráðherra eru það utanríkisráðherra, dómsmálaráðherra og ráðuneytisstjórar ráðuneytanna þriggja, tveir þingmenn, annar úr flokki í meirihluta og annar úr flokki í minnihluta, forstjóri Landhelgisgæslunnar, Ríkislögreglustjóri og fulltrúi Landsbjargar.

Ráðið mun funda ekki sjaldnar en ársfjórðungslega og uppfæra Alþingi um framkvæmd þjóðaröryggistefnunnar árlega. Auk þess veitir það utanríkismálanefnd þingsins upplýsingar um hver þau mál sem líkleg eru til að hafa áhrif á þjóðaröryggisstefnuna og framkvæmd hennar. Þá skal ráðið stuðla að endurskoðun þjóðaröryggisstefnunnar eigi sjaldnar en á 5 ára fresti.