Þingmenn Vinstri grænna, Framsóknar, Pírata og Samfylkingar í allsherjar- og menntamálanefnd gagnrýna Kristján Þór Júlíusson menntamálaráðherra og ríkisstjórnina harðlega í tenglsum við mögulega sameiningu Fjölbrautaskólans við Ármúla og Tækniskólans. Segja þingmennirnir í sameiginlegri yfirlýsingu að Kristján Þór hafi á opnum fundi nefndarinnar í morgun ekki getað staðfest að réttindi starfsmanna FÁ yrðu tryggð ef af yfirtöku Tækniskólans yrði og að nemendur skólans bæru engan skaða af framkvæmdinni.

Á fundinum kom fram að athugun á yfirtöku Tækniskólans á starfsemi FÁ hafi farið af stað í febrúar, áður en ríkisstjórnin lagði fram fjármálaáætlun sína, þar sem hvergi er minnst á þessar fyrirætlanir. Þar að auki hafi ráðherrann þagað um áformin þegar staða starfs- og verknáms var rædd í þingsal 24. apríl síðastliðinn. Kristján Þór sagði í morgun að hann hefði kynnt stjórnarþingmönnum þessi áform áður en málið rataði í fjölmiðla.

Minnihlutinn gagnrýnir að í stað þess að ráðast í heildarstefnumörkun um framhaldsskólastigið þá sé aðeins verið að skoða sameiningu Tækniskólans og FÁ:

Það liggur fyrir að hér er um að ræða pólitíska ákvörðun um að einkavæða hluta framhaldsskólakerfisins, því enn hafa ekki komið fram nein fagleg eða rekstrarleg rök að baki valinu á þessum tilteknu skólum.

Rætt verður um málið á Alþingi eftir hádegi í dag.