Illugi Gunnarsson, níu ára gamall drengur í Vesturbæ Reykjavíkur, hefur verið skipaður stjórnarformaður Byggðastofnunar. Þetta kemur fram í bréfi sem Illugi fékk sent á heimili sitt. Gera má ráð fyrir að um sé að ræða mistök og að alnafni hans, ráðherrann fyrrverandi, hafi átt að fá bréfið, en þó er aldrei að vita þar sem Illugi hinn yngri er sonur Katrínar Jakobsdóttur formanns Vinstri grænna. DV greinir frá þessu.

Faðir Illuga yngri, Gunnar Sigvaldason, greinir frá þessari spaugilegu bréfasendingu á Facebook-síðu sinni.

Stundum færir pósturinn manni eintóm gleðitíðindi. Rétt í þessu fékk ég þær fréttir að sonur minn yrði stjórnarformaður Byggðastofnunar. Við fjölskyldan erum svo stolt!,

skrifar Gunnar og birtir þessu til vitnis umrætt bréf þar sem nafn og heimilisfanga sonar hans er kyrfilega tiltekið. Undir bréfið skrifar Ragnhildur Hjaltadóttir ráðuneytisstjóri, fyrir hönd samgöngu- og sveitarstjórnarráðherra.