Björt Ólafsdóttir, umhverfis- og auðlindaráðherra, undirritaði í dag friðlýsingu Jökulsárlóns og umfangsmikilla svæða sem liggja að lóninu. Um leið er svæðið fellt inn í Vatnajökulsþjóðgarð. Þetta kemur fram í fréttatilkynningu frá ráðuneytinu. Mað friðlýsingunni nær þjóðgarðurinn frá hæsta tindi landsins niður að fjöru. Þessi breyting felur í sér að hluti þjóðvegar 1 liggur nú í gegn um þjóðgarð í fyrsta sinn.

Friðlýsingin tekur til jarðarinnar Fells og nærliggjandi þjóðlenda. Gengið var frá kaupum ríkisins á Felli í Suðursveit í janúar sl. Jörðin Fell nær yfir Jökulsárlón að hluta og á landamerki að þjóðlendum vestan vegna lónsins og norðaustur af Felli. Með friðlýsingunni nú eru þessi svæði felld inn í Vatnajökulsþjóðgarð, alls um 189 ferkílómetrar. Er Vatnajökulsþjóðgarður þar með 14.141 ferkílómetrar að flatarmáli.

Sérstaða landsvæðisins er mjög mikil. Það er mótað af framgangi og hopun jökla og einkennist af sérstæðum jökulöldum. Ein helsta náttúruperla svæðisins er Jökulsárlón sem er stærsta og þekktasta jaðarlón á landinu en þangað liggur nú stöðugur straumur ferðamanna. Með friðlýsingunni nær Vatnajökulsþjóðgarður nú einnig yfir stóran hluta Breiðamerkursands og meginhluta Fjallsárlóns en á öllu þessu svæði er rekin umfangsmikil ferðaþjónusta.

Telur ráðuneytið að með því að fella svæðið inn í Vatnajökulsþjóðgarð sé verndun og stjórnun þess betur samræmd, til dæmis hvað varðar umgengni og öryggi ferðamanna. Svæðið er nú hluti rekstrareiningar suðursvæðis þjóðgarðsins og svæðisráð sem er undir formennsku sveitarfélagsins Hornafjarðar. Segir í fréttatilkynningunni að framundan séu krefjandi verkefni við uppbyggingu innviða og landvörslu á svæðinu.

Þar að auki styrki friðlýsingin vinnu við tilnefningu Vatnajökulsþjóðgarðs sem náttúruminja á heimsminjaskrá UNESCO sem unnið hefur verið að um nokkurt skeið.