Lögmaðurinn Jón Magnússon fordæmir lögbannið sem sett var á umfjöllun Stundarinnar úr gögnum Glitnis. Líkt og greint hefur verið frá mættu fulltrúar Sýslumannsins í Reykjavík ásamt lögmanni Glitnis á skrifstofu Stundarinnar og kröfðust þess að fá gögnin sem Stundin hafði undir höndum. Samþykkti sýslumaður lögbann á frekari umfjöllun sem byggir á gögnunum.

Jón segir þetta óviðunandi:

Stundin er með ómerkilegri sneplum sem gefin er út hér á landi að mínu mati. Hvað sem því mati líður þá á Stundin sama rétt og aðrir fjölmiðlar og takmarkanir og tálmanir á tjáningarfrelsinu er óviðunandi í lýðræðisríki,

segir Jón á Fésbók. Hann segir að fyrir nokkrum árum hafi hann verið lögmaður fréttamiðils sem hafi verið bannað með lögbanni að birta gögn sem sögð voru stolin. Hæstiréttur ógilti það lögbann og fréttamiðillinn birti gögnin:

Hafa lögbannsmenn dagsins gleymt þessu fordæmi eða eru brýnir tímabundnir hagsmunir í húfi?

Sem lýðræðissinni og unnandi tjáninarfrelsis fordæmi ég allar þöggunaraðgerðir og aðför að tjáningarfrelsinu eins og þeirri sem gripið var til. Skiptir þar engu það mat mitt að Stundin sé ómerkilegur skítasnepill. Þeir eru líka hluti af lýðræðislegri umræðu.