Þorbjörn Þórðarsson fréttamaður á Stöð 2 segir að annaðhvort sé lögskýring Hæstaréttar Íslands á umboðssvikum röng eða það skipti máli hver eigi í hlut þegar tekin sé ákvörðun um saksókn efnahagsmála. Vísar Þorbjörn í leiðara Fréttablaðsins í dag í símtal Davíðs Oddssonar þáverandi seðlabankastjóra og Geirs H. Haarde þáverandi forsætisráðherra þar sem kom fram að Davíð vissi að þær 500 milljónir evra sem Seðlabankinn lánaði Kaupþingi myndu líklegast tapast.

Vitnar Þorbjörn í niðurstöðu Hæstaréttar í Exeter-málinu, þar sem sakfellt var fyrir umboðssvik í tengslum við lánveitingu, hafi einstaklingar losað sig undan persónulegum ábyrgðum en ekki var fjallað sérstaklega um auðgunarásetning í forsendum réttarins. Í Imon-málinu hafi Hæstiréttur sérstaklega tekið fram að það nægði til sakfellingar að sýna fram á háttsemi sem valdið hafi verulegri fjárhagsáhættu.

Þorbjörn segir að í kjölfar þess að samtalið var birt þá liggi fyrir að þeir Davíð og Geir töldu öruggt að peningarnir myndu tapast og að veruleg fjártjónshætta hafi blasað við:

Héraðssaksóknari skoðaði útprentun af símtalinu á sínum tíma og taldi ekki ástæðu til að aðhafast. Annað hvort er lögskýring Hæstaréttar Íslands á umboðssvikum röng eða það skiptir máli hver á í hlut þegar héraðssaksóknari tekur ákvörðun um saksókn efnahagsbrota. Sitt er hvað Jón og séra Jón.