Ný hagsmunasamtök íslenskra fjártæknifyrirtækja voru stofnuð í dag en tilgangurinn er að „gæta hagsmuna þeirra fjártæknifyrirtækja á Íslandi sem með nýsköpun í fjármálageiranum vinna að því breyta og bæta núverandi umhverfi fjármálakerfisins,“ líkt og segir í tilkynningu.
Stakkaskipti verða í samkeppnisumhverfi fjármálamarkaða á næstu árum og ræður þar mestu ný greiðsluþjónustutilskipun Evrópusambandsins (PSD 2). Þá eru tækninýjungar að ryðja burt aðgangshindrunum sem til þessa hafa staðið í vegi fyrir innkomu nýrra fyrirtækja á fjármálamarkaðinn.
Georg Lúðvíksson er talsmaður samtakanna:
„Það eru þónokkuð mörg fyrirtæki sem starfa á þessu sviði hér á landi, þetta er ein þeirra greina nýsköpunar í Evrópu sem er í mestum vexti. Ein meginástæða þess eru breytingar á lögum og reglugerðum, ekki síst PSD 2 reglugerðin sem þvingar banka til að veita aðgang að gögnum, þannig að aðrir geti veitt þjónustuna, með samþykki notendanna. Það liggur fyrir ð nánari útfærsla á þessu verður gerð hér á landi, Evróputilskipun sem fjármálaráðuneytið er að undirbúa innleiðingu á. Samtökin geta þá gætt sameiginlegra hagsmuna gagnvart löggjafanum, haft rödd inn í þessari vinnu, sem er eðlilegra að gera með samtökum en hvert í sínu horni,“
segir Georg.
Samkvæmt honum eru neytendur þegar farnir að sjá aukna stafræna fjármálaþjónustu frá nýjum fyrirtækjum á markaði. Framboð fjármálaþjónustu utan bankanna á eftir að aukast til muna í kjölfar tilskipunar ESB og kostnaður neytenda og fyrirtækja lækkar. Almennt er talið að evrópskir viðskiptabankar geti orðið af allt að fjórðungi tekna sinna á næstu árum vegna þessa en á sama tíma eru fjölmörg tækifæri fyrir banka að opnast og þróast – ekki síst með samstarfi við leiðandi fjártæknifyrirtæki um nýjar lausnir.
Stofnfélagar í Samtökum fjártæknifyrirtækja eru Aur, Framtíðin, Memento, Meniga, Kóði og RB. Aðild að samtökunum geta átt fyrirtæki þar sem meginstarfsemi snýr að nýsköpun, nýtingu og þróun á tæknilausnum á sviði fjármálaþjónustu.
Eva Björk Guðmundsdóttir, formaður samtakanna, hvetur öll íslensk fjártæknifyrirtæki til að sækja um aðild að samtökunum.
Stjórn samtakanna skipa Eva Björk Guðmundsdóttir (Meniga), formaður, Sverrir Hreiðarsson (Aur) og Ellert Arnarson (Framtíðin). Georg Lúðvíksson, forstjóri Meniga hefur verið skipaður talsmaður Samtaka fjártæknifyrirtækja.
