Liverpool tók á móti Watford í ensku úrvalsdieldinni í dag en leiknum lauk með 5-0 sigri heimamanna.

Mohamed Salah gerði sér lítið fyrir og skoraði fernu í leiknum en Roberto Firmino var einnig á skotskónum, eftir sendingu frá Salah.

Jurgen Klopp, stjóri Liverpool var að vonum afar sáttur með frammistöðu sinna manna í dag.

„Þetta var frábær leikur hjá okkur, ég reiknaði með mjög erfiðum leik og við hefðum alveg getað lent í miklu basli hérna í kvöld,“ sagði Klopp.

„Við vissum að við þurftum að vera með kveikt á öllum perum frá fyrstu mínútu og að við þyrftum að leggja okkur 110% fram í öllu því sem við vorum að gera. Mörkin sem við skoruðum voru líka frábær og strákarnir eiga stórt hrós skilið.“

„Þvílíkur leikur hjá Salah, að koma að fimm mörkum er magnað en að skora fjögur er stórkostlegt. Mörkin hans eru okkur gríðarlega mikilvæg því þetta getur allt talið í lok tímabilsins,“ sagði Klopp að lokum.