Sara Björk Gunnarsdóttir skrifaði undir hjá uppeldisfélaginu Haukum í dag. Hún lék síðast með Al-Qadsiah í Sádi-Arabíu og ræddi árin tvö þar í viðtali við 433.is eftir undirskrift í Hafnarfirði í dag.

„Þetta var lærdómsríkt, ævintýri. Þetta var mjög auðmýkjandi. Það var ótrúlegt að kynnast þessum stelpum, sumar eru kannski þrítugar og búnar að spila fótbolta í þrjú ár.

Aðrar eru kannski að spila fótbolta án þess að fjölskylda þeirra samþykki það,“ sagði Sara Björk, sem hefur auðvitað spilað fótbolta á hæsta stigi með Lyon, Juventus og Wolfsburg einnig.

Söru og fjölskyldunni leið vel í Sádí, en maðurinn hennar er knattspyrnumaðurinn Árni Vilhjálmsson. Hann spilaði í C-deild Sádi-Arabíu á meðan þau voru úti.

„Það gekk vel hjá mér og Árna, Ragnar var á leikskóla og það gekk ótrúlega vel líka. Þetta er auðvitað sjúklega langt í burtu en fjölskyldan var dugleg að koma að heimsækja okkur.“

Ítarlegt viðtal við Söru Björk er í spilaranum hér að neðan.