Sadiq Khan, borgarstjóri Lundúna, hefur vakið athygli með ummælum sínum um fallbaráttu Tottenham og West Ham í ensku úrvalsdeildinni. Khan sagði að það gæti í raun verið hagstæðara fyrir skattgreiðendur í borginni ef Tottenham félli niður í Championship en West Ham héldi sæti sínu.
Tottenham og West Ham berjast nú um að forðast fall ásamt Wolves og Burnley. West Ham er þó í verri stöðu þar sem liðið er tveimur stigum á eftir Spurs þegar tvær umferðir eru eftir af tímabilinu.
Ástæðan fyrir ummælum Khans tengist rekstri London Stadium, heimavallar West Ham. Greater London Authority, sem er fjármögnuð af skattgreiðendum, sér um stóran hluta rekstrarkostnaðar vallarins á leikdögum á meðan West Ham greiðir um 4,4 milljónir punda í ársleigu.
Khan gagnrýndi samninginn sem gerður var þegar Boris Johnson var borgarstjóri Lundúna og sagði hann vera „samning aldarinnar“ fyrir West Ham.
„Ef West Ham fellur gæti City Hall tapað allt að 2,5 milljónum punda á ári vegna aukins kostnaðar við rekstur vallarins,“ sagði Khan.
Ástæðan er sú að fleiri heimaleikir eru leiknir í Championship en í úrvalsdeildinni, sem myndi auka kostnað vegna öryggisgæslu og reksturs.
Khan sagði í léttum tón að stuðningsmenn annarra liða í London ættu því líklega að halda með West Ham í fallbaráttunni þar sem það væri hagstæðara fyrir skattgreiðendur borgarinnar.
