Arsenal hefur orðið fyrir miklu áfalli fyrir úrslitaleik Meistaradeildarinnar gegn Paris Saint-Germain eftir að Ben White meiddist í sigri liðsins gegn West Ham um helgina.
Samkvæmt enskum miðlum er talið að White hafi orðið fyrir meiðslum á liðböndum í hné og verði frá keppni út tímabilið. Varnarmaðurinn sást yfirgefa London Stadium með spelku á hnénu eftir leikinn þar sem Arsenal vann mikilvægan 1-0 sigur í titilbaráttunni.
White þurfti að fara af velli í fyrri hálfleik eftir samstuð við Crysensio Summerville. Meiðslin gætu einnig sett þátttöku hans á heimsmeistaramótinu í sumar í hættu samkvæmt fréttum á Englandi.
Mikel Arteta stendur nú frammi fyrir erfiðri stöðu í varnarlínunni þar sem Jurrien Timber er einnig frá vegna meiðsla. White hefur verið lykilmaður hjá Arsenal undanfarnar vikur og byrjaði meðal annars í báðum undanúrslitaleikjunum gegn Atletico Madrid í Meistaradeildinni.
Hinn 28 ára gamli White hefur glímt við hnévandamál áður og Arsenal óttast nú að meiðslin séu alvarlegri en fyrst var talið.
Fjarvera hans gæti reynst Arsenal dýrkeypt í stærsta leik félagsins í Evrópu í mörg ár þegar liðið mætir PSG í úrslitaleiknum.
