Hjón í Utah í Bandaríkjunum hafa verið handtekin í tengslum við andlát 11 ára sonar síns á síðasta ári.

Upphaflega var talið að drengurinn hefði svipt sig lífi en rannsókn málsins hefur leitt ýmislegt óhugnanlegt í ljós og telur lögregla að drengurinn hafi verið beittur langvarandi ofbeldi sem og önnur börn á heimilinu.

People greinir frá því að hjónin, Brigham Merrell og Melinda Merrell, hafi verið handtekin á dögunum vegna málsins, en drengurinn lést í september á síðasta ári á heimili fjölskyldunnar í Tremonton í Utah.

Lögregla var kölluð að heimilinu þann 21. september eftir að tilkynning barst um meðvitundarlaust barn. Sjúkraflutningamenn reyndu endurlífgun á vettvangi áður en drengurinn var fluttur á sjúkrahús þar sem hann var úrskurðaður látinn.

Samkvæmt lögreglu sagði faðirinn í neyðarlínusímtali að hann hefði komið að syni sínum eftir að hann hafði hengt sig. Við rannsókn málsins komu þó fram atriði sem vöktu grunsemdir lögreglu.

Í gögnum sem People hefur undir höndum kemur fram að lögreglumenn sem komu fyrstir á vettvang hafi fundið föðurinn krjúpandi við hlið barnsins án þess að framkvæma endurlífgun, þrátt fyrir að hann hefði sagst vera að því.

Þá sýni upptökur úr eftirlitsmyndavélum inni á heimilinu að faðirinn hafi flutt drenginn um húsið á meðan viðbragðsaðilar börðu á dyrnar til að komast inn. Þá hefðu áverkar á drengnum ekki gefið til kynna að hann hefði látist af völdum hengingar.

Lögregla segir rannsóknina hafa leitt í ljós mynstur langvarandi líkamlegs ofbeldis gegn börnunum á heimilinu. Þar á meðal hafi börnunum verið neitað um mat, þau beitt líkamlegum refsingum með beltum og pönnum og látin dvelja í útigerði fyrir hunda þegar þau voru talin hafa hagað sér illa.

Brigham Merrell hefur verið ákærður fyrir manndráp og pyntingar á barni en Melinda Merrell hefur verið ákærð fyrir pyntingar. Ekki liggur fyrir hvort hjónin hafi játað eða neitað sök.

Í þessari frétt er fjallað um ofbeldi í nánu sambandi. Verðir þú fyrir ofbeldi í nánu sambandi eða ef grunur vaknar um slíkt er bent á lögreglu í síma 112, Kvennaathvarfið í síma 561-1205 og hjálparsíma Rauða krossins í 1717. Þá má nálgast leiðarvísi fyrir þolendur slíks ofbeldis á vef Neyðarlínunnar.