Héraðsdómur Reykjaness hefur dæmt fyrirtækið Ræstitækni ehf. til að greiða fyrrverandi stafsmanni sínum, Andreinu Edwards, 300 þúsund krónur í miskabætur. Það eru þó aðeins um tíu prósent af kröfu stefnanda en dómurinn hafnaði mörgum af kröfum og ávirðingum Andreinu í garð fyrirtækisins.
Krafa Andreinu, sem er frá Venesúela, hljóðaði upp á 3.293.668 krónur. Um 300 þúsund krónur af kröfunni varðaði vangreidd laun og orlof en á meðan málið var til meðferðar fyrir dómi greiddi fyrirtækið upp þá kröfu. Eftir stóð krafa upp á um þrjár milljónir króna í miskabætur vegna framkomu fyrirtækisins við starfsmanninn eftir að hún varð trúnaðarmaður Eflingar á vinnustaðnum.
Andreina sakaði Ræstitækni um ólöglega meingerð gegn sér en framkoma fyrirtækisins í hennar garð hafi versnað mjög eftir að hún varð trúnaðarmaður og ennfrekar eftir að hún var ófrísk af barni sínu. Ræstitækni hafi haft óeðlileg afskipti af störfum hennar sem trúnaðarmanns, sett hana undir ómannúðlegt vinnuálag og hún hafi verið neydd til að vinna með starfsmanni sem áreitti hana.
Í texta dómsins er farið yfir ásakanir Andreinu og segir meðal annars:
„Stefnandi heldur því fram að framganga stefnda gagnvart henni hafi falið í sér ólögmæta meingerð gegn æru hennar og persónu. Hún hafi verið látin líða fyrir baráttu sína fyrir réttindum starfsmanna og að stefndi hafi haft óeðlileg afskipti af trúnaðarmannastörfum hennar. Hún hafi verið boðuð ein á fund með þremur yfirmönnum þar sem hún hafi verið yfirheyrð og ávítt fyrir að veita rangar upplýsingar um kjaramál starfsmanna og henni verið bannað að tjá sig um kjarasamningsbundin réttindi við samstarfsfólk sitt. Í kjölfarið hafi henni verið gert að standa frammi fyrir samstarfsfólki sínu og segja að hún hefði veitt þeim rangar upplýsingar þrátt fyrir að það væri ekki raunin. Þá hafi henni verið meinuð þátttaka á trúnaðarmanna- námskeiðum á grundvelli þjóðernisuppruna.
Í dómnum er farið yfir ýmis gögn sem lúta að aðsökunum Andreina í garð Ræstitækni, meðal annars tölvupóstsamskipti og niðurstöður athugunar fyrirtækisins Vinnuverndar á starfsaðastæðum. Á grundvelli gagnanna hafnar dómurinn ýmsum ásökunum Andreinu í garð fyrirtækisins. Til dæmis sé ekki hægt að fallast á ásakanir hennar um að hún hafi verið beitt atvinnukúgun, aðstæður hennar gerðar erfiðar eða henni sýnd óvild, ósannað sé að hún hafi verið undir óeðlilegu álagi og því fari fjarri að hún hafi verið hrakin úr starfi, eins og hún sakar Ræstitækni um.
Hins vegar telur dómurinn að Ræstitækni hafi brotið gegn Andreinu með því að láta hana standa frammi fyrir samstarfsfólki sínu og leiðrétta upplýsningar sem hún hafið gefið þeim um efni kjarasamnings, upplýsingar sem hún hafði gefið í góðri trú. Telur dómurinn að vegna þessa athæfis beri fyrirtækinu að greiða henni miskabætur.
Voru miskabæturnar ákveðnar 300 þúsund krónur. Einnig þarf Ræstitækni að greiða henni málskostnað upp á 500 þúsund krónur. Fyrirtækið þarf því að greiða henni samtals 800 þúsund krónur.
Dóminn má lesa hér.
