Manchester United mun að öllum líkindum klæðast nýjum heimabúningi næsta tímabils í síðustu tveimur leikjum þessa tímabils, samkvæmt fréttum frá Daily Mail.
United er sagt ætla að frumkynna búninginn í leikjum gegn Nottingham Forest og Brighton áður en hann fer í almenna sölu í sumar.
Þetta fyrirkomulag hefur orðið sífellt algengara hjá félögum í ensku úrvalsdeildinni, þar sem nýir búningar eru kynntir fyrr til að auka áhuga og sölu.
Nýi búningurinn, sem er framleiddur af Adidas, sækir innblástur til búninga félagsins frá áttunda áratugnum. Meðal nýjunga er röndótt kragi og áletrunin „United“ aftan á kraganum.
Þó að United hafi ekki tekið upp á þessu í fyrra hefur þetta verið vinsæl leið hjá öðrum félögum. Arsenal hefur til dæmis gert þetta nýlega og Tottenham Hotspur gerði það frægt í bikarúrslitum árið 1987.
