Það getur verið varasamt að vera of duglegur að henda hlutum í ruslið eins og Pamela Howard-Thornton í Kentucky komst að nýlega.

Fyrst dreymdi hana að hún hefði unnið stóra vinninginn í lottó. Daginn eftir fór hún því í Speedway-verslun með það í huga að kaupa svokallaða Flamingo Bingómiða. Henni snerist þó hugur og keypti annan miða sem hún vann 200 dali á. Hún fór síðan heim en hélt áfram að segja við sjálfa sig:  „Farðu og náðu í þennan miða.“ 

Síðar sama dag fór Howard-Thornton því aftur í verslunina og notaði fyrri vinning sinn til að kaupa fjóra Flamingo Bingómiða, þar sem aðalvinningurinn var 80 þúsund dalir eða tæpar 10 milljónir króna.

„Þeir lágu á borðinu allan daginn,“ sagði hún við lottóið eins og kom fram í fréttatilkynningu. „Ég steingleymdi þeim þar til rétt fyrir miðnætti þegar ég ákvað að skafa miðana. Fyrstu þrír voru ekki með vinningi svo ég henti þeim í ruslið. Þá hugsaði ég með mér: „Hvar er fjórði miðinn minn?“ Ég leit í ruslið og hugsaði með mér: „Ó, guð minn góður, ég hef hent honum.““

Sá miði færði henni stóra vinninginn, en hún segist hafa efast þar til hún gat staðfest vinninginn í appi lottóins. Þá byrjaði hún að gráta og öskra.

„Ég hringdi strax í dóttur mína og mömmu,“ sagði Howard-Thornton við lottóið. „Mamma hefur alltaf sagt að hún myndi gefa hvað sem er ef hún gæti bara séð mig vinna stóran vinning áður en hún vinnur eitthvað. Þegar ég hringdi í hana kvöldið sem ég vann var hún svo þakklát og glöð fyrir mína hönd.“

Howard-Thornton fékk 57.600 dali eftir skatta. Með vinningnum sínum sagðist hún ætla að kaupa nýjan bíl og deila hluta af honum með mömmu sinni.