Bandaríski leikarinn Nicolas Cage er nær óþekkjanlegur við tökur á kvikmyndinni Madden. Cage leikur þar John Madden, fyrrverandi þjálfara Oakland Raiders, og á myndum sem teknar eru á setti í Atlanta á mánudag má sjá Cage ganga um í bláum íþróttagalla, hvítum íþróttaskóm og með sítt hár.

Christian Bale leikur Al Davis, eiganda Oakland Raiders, og John Mulaney leikur viðskiptamanninn og stofnanda Electronic Arts, Trip Hawkins. David O. Russell er leikstjóri.

TMZ greindi frá því að einn leikari, sem ekki hefur verið nafngreindur, hafi hætt við hlutverk sitt tveimur vikum eftir að tökur hófust eftir að leikstjórinn notaði niðrandi kynþáttaorð við leikararann, nigger eða svertingi. Nokkrir leikarar og starfsfólk tjáðu sig um ásakanirnar og sögðu TMZ að Russel hefði sagt orðið á meðan hann vann að einræðu við leikarann.

Heimildamenn innan Amazon Studios héldu því fram að það hefði verið hugmynd leikarans að nota niðrandi orð í handritinu, en Russell hefði hins vegar notað orðið utan töku. Umræddur leikari mun einnig hafa átt að koma fram nakinn í búningsklefanum í einu atriða myndarinnar, fannst honum það óþægilegt þrátt fyrir vinnu með nándarþjálfa, og að lokum mun Russell hafa sagt leikaranum að hann þyrfti ekki að leika í nektarsenunni. Að sögn mun Russell hafa tjáð sig í því tilviki við leikarann með ófagmannlegum hætti. Viðræður munu þó vera í gangi og mögulega mun ónefndi leikarinn snúa aftur í hlutverkið.

Russell hefur verið í fréttum vegna deilna á tökustað. Árið 2000 hélt George Clooney því fram að Russell hefði öskrað á fólk „allan daginn, frá fyrsta degi“ á tökustað stríðsmyndarinnar Three Kings.