Bjarni Sigfússon vélstjóri og fyrrverandi starfsmaður Faxaflóahafna, ber stjórnendur Faxaflóahafna þungum sökum í tölvupósti sem hann sendi öllum fulltrúum í sveitarstjórnum þeirra sveitarfélaga sem eiga fyrirtækið. Morgunblaðið fjallar um.
Bjarni segir tilgang sinn vera að vekja athygli á „mjög svo vafasömum stjórnarháttum yfirmanna Faxaflóahafna“, og snýr mál hans að þeim Gísla Hallssyni yfirhafnsögumanni, Ólafi Ólafssyni mannauðsstjóra og Gunnari Tryggvasyni hafnarstjóra. Sá síðastnefndi vildi ekki tjá sig um málið við Morgunblaðið.
„Ólafur ásakar mig um að vera hryðjuverkamaður. Ef það eru rædd við hann málefni þá er hann alveg sammála, en þegar hann er búinn að bera málefnin undir Gísla, þá er hann alveg sammála Gísla. Hann sem mannauðsstjóri gerir sér ekki grein fyrir réttindum starfsmanna og er til í að horfa á þau og túlka eins og hann heldur að best sé,“ segir Bjarni og bætir við að Gunnar hafi ekki viljað kynna sér mál hans.
Bjarni starfaði hjá Faxaflóahöfnum um tveggja ára skeið og segist hann hafa verið boðaður á fund Gísla og Ólafs þar sem þeir hafi viljað fá skýringar á því af hverju hann vildi ekki vinna yfirvinnu „þegar þeim hentaði“. Bjarni segist hafa mátt þola hótun um brottrekstur og fullyrðingar um að hann væri „viðvarandi vandamál“ fyrir Faxaflóahafnir.
„Gunnar talar um vinnusiðferði, ef ég vinn ekki yfirvinnu eins og þeim hentar og sýnist þá lendi það á öðrum samstarfsmönnum, og spyr hvar siðferðið sé í því hjá mér. Því miður var eini áhuginn sem hann sýndi þessu máli að hringja persónulega í mig til að segja mér upp í veikindaleyfi sem ég fór í vegna þeirrar árásar sem ég varð fyrir af hálfu Gísla og Ólafs. Ég er sendur til trúnaðarlæknis og fáum dögum eftir það kemur þessi persónulega hringing frá Gunnari,“ segir Bjarni.
Bjarni segist hafa óskað eftir skriflegum rökstuðningi fyrir uppsögninni en því var hafnað. Hann hafi þurft að leita eftir sálfræðilegum stuðningi eftir samskipti sín við yfirmenn.
Morgunblaðið segir nokkra fyrrverandi starfsmenn Faxaflóahafna hafa komið að máli við miðilinn og farið ófögrum orðum um þá vinnustaðarmenningu sem ríki hjá Faxaflóahöfnum. Mál nokkurra séu til meðferðar hjá verkalýðsfélögum.
Nánar er fjallað um málið í Morgunblaðinu í dag.
