Georginio Wijnaldum vill snúa aftur í ensku úrvalsdeildina þegar samningur hans við Al Ettifaq rennur út í sumar.
Hollenski miðjumaðurinn, sem er 35 ára, hefur ekki í hyggju að leggja skóna á hilluna og telur sig enn hafa mikið fram að færa. Hann hefur átt gott tímabil í Sádi-Arabíu þar sem hann hefur skorað 14 mörk og lagt upp sex.
Aðalmarkmið hans er að snúa aftur til Englands, þó engin endanleg ákvörðun hafi verið tekin um næsta skref.
Wijnaldum lék áður með Liverpool þar sem hann spilaði 237 leiki og vann bæði ensku úrvalsdeildina og Meistaradeildina. Hann fór þaðan til Paris Saint-Germain árið 2021.
Hann hefur síðustu þrjú ár leikið með Al Ettifaq en gæti nú snúið aftur á stærsta svið enska boltans.
