Tyler Adams, fyrirliði bandaríska landsliðsins í knattspyrnu, segir að heimsmeistaramótið í sumar geti sameinað bandarísku þjóðina á erfiðum tímum. Bandaríkin halda mótið ásamt Kanada og Mexíkó og verður þetta annað Heimsmeistaramót Adams með landsliðinu.

Adams, sem leikur í ensku úrvalsdeildinni, sagði í viðtali við Fox News að knattspyrnan hefði einstakan kraft til að sameina fólk óháð pólitík eða samfélagsaðstæðum.

„Knattspyrnan sameinar alla sama hvernig staðan er í heiminum. Það er það sem dró mig að íþróttinni,“ sagði Adams.

Bandaríkin standa nú frammi fyrir mikilli pólitískri spennu og samfélagsumræðu, meðal annars vegna innflytjendamála og mótmæla tengdum aðgerðum alríkisyfirvalda og ICE í Minnesota fyrr á árinu.

Ólíkt sumum bandarískum vetraríþróttamönnum sem gagnrýndu stjórnvöld opinberlega fyrir Vetrarólympíuleikana fyrr á árinu hefur Adams lagt áherslu á mikilvægi samstöðu.

„Ég vona virkilega að þetta mót færi bandarísku þjóðina nær hver annarri,“ sagði miðjumaðurinn.

Bandaríska landsliðið hefur undirbúning sinn fyrir HM eftir mánuð þegar liðið mætir Paragvæ í fyrsta leik sínum á mótinu. Adams verður lykilmaður í liði Bandaríkjanna sem vonast til að ná sínum besta árangri á HM í áratugi.