Raphinha gæti átt yfir höfði sér refsingu vegna gjörða sinn eftir tap Barcelona gegn Atletico Madrid í 8-liða úrslitum Meistaradeildarinnar í gær.

Barcelona var 0-2 undir eftir fyrri leik einvígisins en náði að jafna í seinni leiknum með mörkum frá Lamine Yamal og Ferran Torres.

Ademola Lookman skoraði hins vegar sigurmark Atletico sem tryggði þeim sæti í undanúrslitum, hvar liðið mætir Arsenal eða Sporting.

Eftir leikinn var Raphinha afar ósáttur og sakaði dómarann Clement Turpin um að hafa rænt Barcelona sigrinum, meðal annars vegna þess að liðið fékk ekki vítaspyrnu þegar Koke braut á Dani Olmo.

Hann hraunaði einnig yfir dómarana vegna fleiri atvika og samkvæmt erlendum miðlum gæti aganefnd UEFA refsað honum.

Þess má geta að Raphinha var einnig með stæla við stuðningsmenn Atletico eftir leik og gaf í skyn að félagið myndi detta úr leik í næstu umferð.

Börsungar misstu mann af velli með rautt spjald í báðum leikjunum og eru afar ósáttir við dómgæsluna. Kvartaði félagið til UEFA vegna dómgæslunnar í fyrri leiknum og hyggst gera það sama eftir leikinn í gær.