Mikel Arteta, stjóri Arsenal, segist vera að leita að rétta manninum í framherjastöðuna í liði sínu.
Arsenal missti Gabriel Jesus í meiðsli og síðan þá hefur félagið horft í kringum sig. Benjamin Sesko hjá RB Leipzig er orðaður við félagið en Skytturnar þurfa að greiða 70 milljónir punda til að fá hann. Það er alls ekki víst að það sé raunhæft í janúar.
„Við misstum tvo mjög góða menn í Bukayo Saka og Gabriel Jesus. Okkur vantar mörk og valkosti fram á við. Það er klárt mál,“ sagði Arteta við fjölmiðla í dag.
„Ef við getum fengið rétta manninn þá munum við skoða það. Við fáum ekki hvern sem er en við þurfum aðstoð. Við erum að vinna í þessu,“ sagði Spánverjinn enn fremur.
