Aron Einar Gunnarsson mun ekki spila með Al-Arabi fyrr en í fyrsta lagi á næsti ári, hann á von á því að fara á lán í janúar til þess að spila.
Al-Arabi fékk Marco Verratti undir lok félagaskiptagluggans og fyllt þá útlendingakvóta sinn, ljóst var að einn erlendur leikmaður yrði ekki skráður og þar varð Aron fyrir valinu.
„Ég er ekki búinn að vera þannig séð að æfa, ég byrjaði vikuna áður en ég kom heim vegna fjölskylduaðstæðna,“ segir Aron Einar um stöðuna.
Aron sat fyrir svörum á fréttamannafundi í dag en hann er líklega í byrjunarliði Íslands gegn Liechtenstein á morgun
„Það eru þannig reglur, liðið má vera með fimm útlendinga skráða og Verratti kemur í mitt slott. Ég er með samning hjá klúbbnum og færi mig líklegast á láni í janúar ef ekkert breytist, ég vil ekki vera hjá klúbbnum og vona að einhver meiðist svo ég komi inn. Ég fer líklega á lán í janúar, það er staðan í dag.“
Um meiðslin hefur Aron að segja. „Ég er búinn að vera glíma við þetta, sömu meiðslin hafa dregist á langinn. Ég vissi ekki að þetta myndi taka svona langan tíma. Ég er búinn að eiga góða viku með landsliðinu, þetta er á réttri leið.“
