Fjölmiðlar út um allan heim fjalla nú um Söru Björk Gunnarsdóttur og pistil hennar þar sem hún segir frá þrautagöngu sinni í gengum meðgönguna. Franska félagið Lyon hætti að borga henni laun og kom illa fram við hana.
Stóru miðlarnir BBC, Sky, Guardian, Daily Mail, Japan Times og ESPN hafa allir tekið mál Söru fyrir og fjallað ítarlega um það. Fleiri miðlar hafa sömu sögu að segja, fær Sara mikið lof fyrir að stíga fram og greina frá málinu.
Lyon neitaði að borga Söru Björk laun á meðan hún var ófrísk en þessi magnaða knattspyrnukona eignaðist sitt fyrsta barn í nóvember árið 2021. „Ef Sara fer til FIFA með þetta þá á hún enga framtíð hjá Lyon,“ voru hótanir sem Lyon beitti þegar umboðsmaður Söru reyndi að fá launin hennar.
Sara segir frá því í pilstinum að henni hafi brugðið þegar launin hennar áttu að koma en franska liðið borgaði aðeins brot af þeim.
„Ég vil vera viss um að enginn þurfi að ganga í gegnum það sama og ég aftur. Ég vil að Lyon viti að þetta er ekki í lagi. Þetta snerist ekki aðeins um viðskipti Þetta snýst um réttindi mín sem starfsmanns, konu og manneskju“ segir Sara.
Nú hefur svo komið fram að Sara fékk aðeins rúmar 27 þúsund evrur greiddar frá Lyon á meðan hún gekk með barn sitt. Hún fór með málið til FIFA sem dæmdi henni í hag og franska liðið þurfti að gera upp við hana.
Samkvæmt samningi hennar hefði Lyon hins vegar átt að greiða henni rúmar 109 þúsund evrur. Franska félagið hefur svo nú verið dæmt til að greiða henni skuldina sem er 82 þúsund evrur.
Sara hefur því fengið 12 milljónirnar sem hún átti inni hjá franska félaginu en málið er afar fordæmisgefandi í heimi kvennafótboltans.
Ein fremsta knattspyrnukona heims, hin bandaríska Megan Rapinoe, hefur nú lagt orð í belg. Fyrrum landsliðsfyrirliðinn var á mála hjá Lyon frá 2020-2022 en er nú hjá ítalska stórliðinu Juventus.
Rapinoe er þekkt áhrifakona í fótboltanum og hefur lagt mikið á sig til að berjast fyrir réttindum kvenna í heimi fótboltans.
„Þetta er algjörlega til skammar hjá Lyon. Kúltúrinn hjá Lyon og í Frakklandi á enn langa leið í land. Þið elskið að tala um hversu mikið þið styðjið konur en dæmin sýna að svo er ekki. Ég bið ykkur um að vera félagið sem styður alltaf konur, ekki félagið sem gerði það einu sinni,“ skrifar Rapinoe beitt á Twitter.
Hún leikur með OL Reign í heimalandinu, en þar eru sömu eigendur og hjá Lyon.
