Arnar Gunnlaugsson, þjálfari Víkings Reykjavík, bíður með eftirvæntingu eftir úrslitaleik Mjólkurbikars karla. Hann býst við góðum en krefjandi leik.

Víkingur er í öðru sæti Bestu deildarinnar á meðan FH er í því ellefta. Það skiptir þó litlu fyrir leikinn á laugardag, að sögn Arnars.

„Það er mikil eftirvænting. Þetta er stærsti einstaki leikur ársins. Við erum að spila við mjög stóran og sögulegan klúbb, ekki gengið vel hjá þeim í sumar en ég held það skipti engu máli þegar leikurinn á laugardag hefst,“ segir Arnar við 433.is í aðdraganda leiksins.

Arnar vonast eftir skemmtilegum leik.

„Ég vona að þetta verði skemmtilegt og að bæði lið sæki til sigurs. Fyrirfram á maður von á að við verðum eitthvað aðeins meira með boltann en þeir eru með góða leikmenn innanborðs. Þeir geta meitt okkur verulega ef við erum ekki á tánum.

Þetta er það stór leikur að ég vona að bæði lið mæti með það hugarfar að skemmta áhorfendum og leggja allt í sölurnar.“

Liðin mættust einnig í bikarúrslitum fyrir þremur árum síðan. Þá var FH talið sigurstranglegra liðið en Víkingur hafði þó betur. Nú hefur taflið snúist við.

„Það er aðeins meiri pressa ef þú ert sigurstranglegri. Það búast allir við að þú vinnir leikinn, það er aðeins öðruvísi,“ segir Arnar.

Nánar er rætt við Arnar í spilaranum hér að neðan.