Íslenska karlalandsliðið í knattspyrnu gerði í kvöld 1-1 jafntefli á útivelli gegn Albaníu í Þjóðadeild UEFA með hetjulegri baráttu eftir að hafa spilað nánast allan leikinn einum færri.

Arnar Þór Viðarsson, landsliðsþjálfari Íslands tilfinninguna vera þannig eins og Ísland hafi unnið leikinn.

,,Jú hún er þannig,“ sagði Arnar Þór í viðtali við Viaplay eftir leik. ,,Sérstaklega vegna þess að liðið barðist allan tímann og gafst aldei upp. Hélt áfram að hafa trúnna á möguleikanum sem var til staðar.“

Arnar segir íslenska liðið vita að það ætti til að gerast hjá Albönunum að það slökknaði á þeim síðustu 20 mínúturnar í leikjum þeirra.

,,Við vissum að við myndum fá færi ef við myndum halda áfram að leggja hart að okkur. Vorum einnig með ferskar lappir á bekknum sem við nýttum okkur.“

Hann segir rauða spjaldið sem Aron Einar fékk ekki vera réttan dóm.

,,Nei mér fannst þetta soft. Það sem gerist er að það er tosað í Aron fyrst og það er þess vegna sem Albaninn kemst fram fyrir hann. Dómarinn vildi ekkert gefa honum þetta rauða spjald en svona er þetta bara. Við vorum tilbúnir með plan b og strákarnir framkvæmdu það fullkomlega. Þeir lentu bara í basli með okkur.

Arnar gerði þrefalda skiptingu í síðari hálfleik sem innihélt meðal annars markaskorarann Mikael Neville. Hann segir allt liðið eiga hlut í þessum sigri.

,,Þeir sem byrjuðu inn á hjá okkur og hlupu úr sér lungun skila þessu stigi alveg jafn mikið og þeir sem komu inn á.

Það sem mér finnst vera mikilvægast í þessu er að það er á svona kvöldum sem maður fær staðfestingu á því að liðið er orðið að liðsheild.“

Framfaraskref í Albaníu í kvöld. ,,Við erum að undirbúa liði fyrir næstu undankeppni EM og þetta er skref í rétta átt,“ segir Arnar sem vonast til að geta valið úr bestu leikmönnum Íslands þegar næsta undankeppni hefst.

,,Ég vona það. Það sem er jákvætt er að menn eru hungraðir og það vilja allir spila fyrir íslenska landsliðið og leggja á sig vinnuna. Ég vona að við getum valið okkar sterkasta lið og þá eigum við ansi góða möguleika.“