Nú klukkan níu að íslenskum tíma hefst leikur Vals og Hayasa frá Armeníu í fyrstu umferð undankeppni Meistaradeildar Evrópu. Nálgast má streymi á leikinn hér neðar.
Það þarf að komast í gegnum tvö stig undankeppninnar til að komast í riðlakeppni Meistaradeildarinnar, sem samanstendur af sextán liðum og hefst í október.
Undankeppnin gengur þannig fyrir sig að liðin keppa í fjögurra liða riðlum um eitt laust sæti í næstu umferð.
Pomurje Beltinci frá Slóveníu og Shelbourne frá Írlandi eru einnig í riðli Vals og Hayasa og mætast í hinum undanúrslitaleiknum. Sigurvegarnir mætast svo í úrslitaleik um sæti í annari umferð á sunnudag.
Breiðablik tekur einnig þátt á þessu stigi keppninnar. Liðið mætir Rosenborg. Sigurvegarinn úr leiknum mætir Minsk frá Hvíta-Rússlandi eða Slovacko frá Tékklandi á sunnudag.
Blikar tóku þátt í riðlakeppni Meistaradeildarinnar á síðustu leiktíð.
Leikur Blika og Rosenborg hefst klukkan 16 að íslenskum tíma.