AGF tók á móti SonderjyskE í Íslendingaslag í dönsku úrvalsdeild karla í dag.

Jón Dagur Þorsteinsson og Mikael Anderson voru báðir í byrjunarliði AGF en íslensku landsliðsmennirnir hafa verið að gera það gott með liðinu að undanförnu.

Mikael skoraði tvö mörk í tveimur fyrstu leikjum sínum með aðalliðinu eftir að kappinn gekk aftur til liðs við AGF á dögunum og Jón Dagur skoraði í bikarleik í síðustu viku.

Jón Dagur var aftur á ferðinni í dag þegar hann kom heimamönnum yfir á 35. mínútu. Jón Dagur og Mikael fengu báðir að líta gula spjaldið í seinni hálfleik en meira var ekki skorað í leiknum og 1-0 sigur heimamanna staðreynd.

Kristófer Ingi Kristinsson kom inn á sem varamaður í liði SonderjyskE á 73. mínútu og fékk að líta gula spjaldið á síðustu mínútu uppbótartíma.

AGF er nú í 7. sæti deildarinnar með 12 stig eftir 10 leiki. SonderjyskE er í 11. sæti með 8 stig.