Samkvæmt frétt Goal hafnaði Sergio Ramos því að ganga til liðs við bæði Arsenal og Manchester City áður en hann valdi Paris Saint-Germain.

Félagaskipti hins 35 ára gamla Ramos til PSG voru staðfest í gær. Hann gerði tveggja ára samning. Fyrr í sumar rann samningur hans við Real Madrid út. Hann kom því frítt til PSG. Varnarmaðurinn hafði verið í 16 ár í spænsku höfuðborginni.

Samkvæmt Goal vildi Ramos ekki fara til Arsenal þar sem liðið gat ekki boðið upp á fótbolta í Meistaradeild Evrópu.

Þá segir miðillinn að City hafi ekki heillað hann þar sem samningstilboð þeirra hafi innihaldið skipti til New York City, samstarfsfélags enska liðsins, í framtíðinni.

PSG hafnaði í öðru sæti frönsku Ligue 1 á síðustu leiktíð. Það þykir með öllu óásættanlegt þar á bæ. Ramos fær því það verkefni að hjálpa liðinu að endurheimta Frakklandsmeistaratitilinn, sem og að gera atlögu að sigri í Meistaradeildinni.