FH hefur sent frá sér yfirlýsingu vegna búnings sem félagið klæddist gegn KR í 4-2 tapi í kvöld.

FH er með samning við Nike en lék í Henson búningum í kvöld. Þeir segj ástæðuna vera að félagið hafi ekki viljað frumsýna góðgerðartreyju sína sem hefur verið varabúningur liðsins síðustu ár.

Í frétt Fótbolta.net í kvöld var því haldið fram að gleymst hefði að panta varabúninga. FH segir það rangt í yfirlýsingu, félagið hafi unnið allt í samstarfi við Nike.

FH á svartan varabúning  sem ekki var hægt að nota í kvöld en góðgerðartreyjan er tilbúin og verður frumsýnd í næsta mánuði.

Yfirlýsing FH:
Eins og síðustu þrjú ár mun FH gefa út sérstaka góðgerðartreyju sem þriðja búning sinn í lok maí.

Við höfum leikið sérstaka góðgerðarleiki í treyjunni og einnig gegn KR í vesturbænum, þar sem varabúningur okkar er svartur og ekki gjaldgengur gegn þeim. Þar sem góðgerðartreyjan er ekki komin út í ár var ákveðið að fara ótroðnar slóðir í búningavali kvöldsins.

Ákveðið var að fara í gamla bláa litinn sem prýddi varabúning FH í mörg ár. Treyjan sjálf er frá Henson og er mynstrið óður til Aston Villa treyjunnar sem Henson hönnuðu fyrir þá árið 1986.

FH á svo sannarlega tengingu við Aston Villa – liðið náði glæsilegu jafntefli á Villa Park 2008 og svo hefur núverandi þjálfari liðsins, Jóhannes Karl, spilað fyrir félagið.

Allt var þetta gert í samstarfi við Nike – þar sem við vildum ekki flýta frumsýningu treyjunnar