Myndskeið af Eiði Smára Guðjohnsen aðstoðarþjálfara íslenska landsliðsins sem tekið var í miðborg Reykjavíkur í fyrrakvöld hefur farið manna á milli á samfélagsmiðlum í gær og í dag. Á myndbandinu sést Eiður Smári kasta af sér þvagi á Ingólfstorgi í miðborg Reykjavíkur. Morgunblaðið segir frá málinu á vef sínum í dag.
Málið er til skoðunar hjá Knattspyrnusambandi Íslands samkvæmt vef Morgunblaðsins og er starf Eiðs Smára sagt í hættu.
Á vef Morgunblaðsins segir að Eiður Smári hafi verið í annarlegu ástandi í miðbænum og er Morgunblaðið með myndbandið en birtir það ekki. Sagt er að KSÍ muni setja Eiði Smára tvo kosti, að fara í meðferð eða missa starfið.
Eiður Smári er einn allra besti íþróttamaður í sögu Íslands, ferill hans náði hámarki frá 2000 til 2009 þegar hann var í herbúðum Chelsea og Barcelona. Hann lék 88 landsleiki fyrir Íslands hönd og skoraði í þeim 26 mörk. Eftir að ferlinum lauk fór Eiður í smá pásu frá fótbolta en var ráðinn aðstoðarþjálfari U21 árs landsliðsins í upphafi árs 2019.
Hann og Arnar Þór náðu frábærum árangri með U21 árs liðið áður en þeir tóku svo saman við A-landsliðinu undir lok síðasta árs. Síðasta sumar var Eiður Smári þjálfari FH en hann sagði starfinu lausu þegar honum bauðst að gerast aðstoðarþjálfari Arnars Þórs hjá U21 árs landsliðinu.