Andri Lucas Guðjohnsen gerði jöfnunarmark Íslands í 2-2 jafntefli gegn Norður-Makedóníu í undankeppni Heimsmeistaramótsins í dag. Markið má sjá neðst í fréttinni.
Ekkert gekk upp hjá íslenska liðinu lengi vel í dag en á síðasta stundarfjóðrungi leiksins tókst þeim að breyta 0-2 stöðu í jafntefli.
,,Þetta var æðislegt, að vera partur af þessu. Auðvitað var þetta ekki okkar besti leikur. Sloppy fyrri hálfleikur en hægt og rólega náum við að koma okkur inn i þetta í seinni hálfleik. Þeir sem koma inn á, við vorum klárir í slaginn,“ sagði Andri við RÚV eftir leik.
,,Að gera þetta heima á Laugardalsvellinum, þetta er æðisleg tilfinning.“
Andri var einnig spurður út í kossinn sem faðir hans, Eiður Smári Guðjohnssen, gaf honum áður en hann kom inn á í sínum fyrsta landsleik gegn Rúmeníu á fimmtudag.
,,Bara svona father-son moment. Auðvitað er þetta pabbi minn sem aðstoðarþjálfari og maður reynir að halda þessu eins proffesional og maður getur. Hann var bara stoltur að sjá son sinn koma inn á í sínum fyrsta landsleik. Ef ég á að vera alveg hreinsskilinn þá man ég ekki alveg eftir þessu,“ sagði Andri um kossinn.
Andri leikur með númer 22 á bakinu. Það er sama númer og Eiður Smári bar á sínum ferli með landsliðinu.
,,Ég vissi ekkert að talan mín væri 22. Ég labbaði bara inn í klefa og sá númer 22 með Guðjohnsen á bakinu,“ sagði Andri að lokum.
Smelltu hér til að sjá mark Andra í dag.