Al-Hilal hefur mikinn áhuga á því að krækja í Gylfa Þór Sigurðsson leikmann Everton í sumar. Samkvæmt erlendum miðlum hefur Al-Hilal haft samband við Everton með það fyrir auga að kaupa Gylfa.
Þetta er ekki í fyrsta sinn sem félag frá Sádí-Arabíu reynir að fá Gylfa en það kom einnig upp síðasta sumar. Talsvert var rætt og ritað um framtíð Gylfa Þórs hjá Everton fyrir ári síðan, hann íhugaði aldrei að fara og Everton var ekki með nein plön um að selja hann. „Það kom þannig séð aldrei neitt upp, aldrei frá mér og aldrei frá liðinu. Ég vissi af einhverjum áhuga hér og þar, það var ekki í plönunum hjá mér eða Everton,“ sagði Gylfi Þór í samtali við 433.is á þeim tíma.
Erlendir miðarl hafa sagt frá tilboði sem Gylfi fékk frá Sádí Arabíu fyrir ári síðan, þar er vel borgað en það heillaði ekki Gylfa. „Nei, ég var ekkert að fara þangað,“ sagði Gylfi fyrir ári síðan í viðtali við 433.is.
Ljóst er að Gylfi sem er sagður þéna 850 milljónir á ári hjá Everton getur fengið ríflega launahækkun hjá Al-Hilal. Tyrkneski blaðamaðurinn Ekrem Konur fjallar um málið og segir að ekki sé talið líklegt að Gylfi vilji fara til Sádí-Arabíu á þessum tímapunkti.
Gylfi er á leið inn í sitt fimmta tímabil með Everton en rætt hefur verið um að Everton framlengi samning Gylfa sem er 31 árs gamall.
Það er þekkt stærð að leikmenn á seinni árum ferilsins fari í minni deildir þar sem miklir fjármunir eru í gangi en Bafétimbi Gomis fyrrum framherji Gylfa hjá Swansea er í herbúðum Al-Hilal.