England er með hægasta sóknarleikinn á Evrópumótinu í knattspyrnu en þetta kemur fram í Daily Mail. Englendingar hafa ekki heillað á EM í sumar, en Southgate er þekktur fyrir að leggja frekar áherslu á varnarleik.
Englendingar eru þrátt fyrir það komnir áfram í 16-liða úrslit og unnu sinn riðil. Liðið hefur aðeins skorað 2 mörk á mótinu og aldrei hefur lið unnið sinn riðil á EM og skorað svona fá mörk.
Opta hefur tekið saman hraða í sóknarleik allra liðanna á EM og þar sitja Englendingar á botninum sem kemur líklega fáum á óvart miðað við spilamennskuna. Wales trónir á toppnum og þar á eftir kemur Norður-Makedónía og Ungverjar fylgja á eftir í þriðja sæti.
Englendingar eru einnig neðarlega hvað varðar skot í leik en þeir hafa aðeins átt 7,3 skot í leik. Einu liðin með verri árangur hvað það varðar er Ungverjaland (5) og Finnland (6,3).
Enskir stuðningsmenn eru vægast sagt ósáttir við spilamennsku síns liðs fram á við þar sem liðið hefur úr mörgum spennandi og skapandi leikmönnum að moða.