Víkingur Reykjavík tók á móti KR í 9. umferð Pepsi Max-deildar karla í kvöld. Niðurstaðan var jafntefli eftir dramatík.
Nikolaj Hansen kom heimamönnum yfir á 10. mínútu eftir fyrirgjöf Helga Guðjónssonar. Staðan í hálfleik var 1-0.
Það var komið inn í uppbótartíma og allt stefndi í sigur Víkinga þegar Kristján Flóki Finnbogason gerði jöfnunarmark KR. Kristinn Jónsson gaf þá fyrir og framherjinn setti boltann í slána og inn. Lokatölur 1-1. Afar svekkjandi fyrir Víkinga.
Víkingur er í öðru sæti deildarinnar með 19 stig eftir níu leiki. 4 stig eru upp í topplið Vals sem á einnig leik til góða.
KR er í fimmta sæti með 15 stig eftir níu leiki.