Freyr Alexandersson segir að með tímanum skilji hann minna og minna af hverju leikur Danmerkur og Finnlands á Evrópumótinu í gær hafi verið haldið áfram eftir að Christian Eriksen hneig til jarðar.

Eins og flestir, ef ekki allir, vita þá hneig Eriksen niður í leik með danska landsliðinu gegn Finnlandi á Evrópumótinu í gær. Hann andaði hvorki né var með púls um tíma og þurfti læknalið að beita hjartahnoði. Til allrar hamingju komst Eriksen þó aftur til meðvitundar og gat bæði talað og andað eftir að hafa verið fluttur á sjúkrahús.

Leiknum var svo haldið áfram síðar um kvöldið. Það hefur vakið upp misjöfn viðbrögð.

Freyr var sérfræðingur í setti yfir leiknum. Hann segist enn dofinn en skilur ekki hvers vegna leiknum var haldið áfram.

,,Eftir að hafa legið yfir þessu í gær og í morgun, dofinn þá skil ég minna og minna af hverju leikurinn var settur af stað aftur. Það meikar engan sens,“ skrifaði Freyr á Twitter.

Hann segist ekki finna neina útskýringu á því af hverju Eriksen hneig niður í leiknum.

,,Núna bíða allir eftir útskýringum, hvernig gat þetta gerst. Ég er búinn að horfa á seinustu 20 min fyrir atburðinn aftur. Ekkert er óeðlilegt við C.Eriksen á þessum tíma. Maður skilur ekkert.“

Freyr vakti svo athygli á því að Eriksen sé ekki bólusettur. Atvikið hefur því ekkert með bóluefni að gera.

,,En eitt er mikilvægt að komi fram. C.Eriksen er ekki bólusettur. Þetta atvik hefur því enga tengingu við bóluefni.“

Að lokum sagði Freyr að það eina sem skipti virkilega máli væri það að vel gangi hjá Eriksen í dag.

,,Við sjáum fótboltann halda áfram að sameina fólk,“ bætti hann svo við.