Oliver Heiðarsson 19 ára framherji er á barmi þess að semja við FH samkvæmt heimildum 433.is.

Þessi 19 ára sóknarmaður vakti talsverða athygli fyrir framgöngu sína með Þrótti í sumar, liðið var á barmi þess að falla úr Lengjudeildinni þegar mótið var flautað af vegna kórónuveirunnar.

Oliver skoraði fjögur mörk í 19 leikjum með Þrótti í sumar en um var að ræða hans fyrsta heila tímabil í meistaraflokki.

Oliver rifti samningi sínum við Þrótt á dögunum en samkvæmt heimildum hefur talsverður fjöldi liða reynt að semja við framherjann síðustu daga og vikur. Hann ákvað að semja við FH og verður gengið frá málunum á næstu dögum.

Oliver ólst upp á Englandi en hann á ekki langt að sækja hæfileikana, faðir hans er Heiðar Helguson. Heiðar átti afar farsælan feril á Englandi og með íslenska landsliðinu. Líkt og Oliver þá lék Heiðar með Þrótti á sínum yngri árum.

Logi Ólafsson tók við sem þjálfari FH á dögunum eftir að Eiður Smári Guðjohnsen lét af störfum til að taka við sem aðstoðarþjálfari íslenska landsliðsins.