Framtíð sóknarmannsins Gary Martin hefur verið í umræðunni en hann er samningsbundinn Val.

Ólafur Jóhannesson, þjálfari Vals, tjáði 433.is það í gær að Gary mætti finna sér nýtt félag þrátt fyrir að hafa aðeins kom til liðsins fyrr á árinu.

Valur hefur verið í basli í upphafi tímabils og er aðeins með eitt stig eftir fyrstu tvo leikina.

Knattspyrnusérfræðingur Hjörvar Hafliðason segir að það sé vitleysa að kenna Gary um vandamál Vals.

,,Gary Martin er bara nákvæmlega eins og hann hefur verið síðan hann kom til Íslands,“ sagði Hjörvar í kvöldfréttum Stöðvar 2.

,,Það á ekkert að koma Valsmönnum á óvart ef hann sé pínu krefjandi. Hann er ekkert vandamálið, þeir vissu nákvæmlega hvaða leikmann þeir voru að fá.“

,,Er þetta krísa? Nei en þessir fyrstu þrír leikir hafa verið slakir og meistarakeppnin var líka léleg.“

,,Þeir eru búnir að nota 18 leikmenn sem er svipað og Wolves var að nota í ensku úrvalsdeildinni í allan vetur.“

,,Það eru rosalega margir leikmenn í þrjá leiki. Það segir okkur eitt að þjálfarinn veit ekkert hvaða lið hann á að nota.“

,,Ef það er einn maður sem getur bjargað þessu þá er það Óli Jó, hann er besti þjálfarinn í deildinni.“