Arnar Gunnlaugsson, þjálfari Víkings R, var ánægður í kvöld eftir sigur sinna manna á Grindavík.

Víkingar unnu 1-0 sigur á Grindavík en markið kom á 80. mínútu leiksins og þurftu Víkingar að sýna þolinmæði við erfiðar aðstæður í kvöld.

,,Mér líður mjög vel, þetta var frábær sigur. Leikurinn var erfiður og aðstæðurnar voru erfiðar en við sýndum þroska og karakter,“ sagði Arnar við Stöð 2 Sport.

,,Við vorum ekki að panikka, það vantaði fleiri færi í seinni en þetta voru mjög flott þroskamerki á liðinu.“

,,Maður vonast eftir því að markið komi fyrr en Grindvíkingar voru þéttir til baka og það vantaði herslumuninn. Við töluðum um það í hálfleik að markið myndi kannski koma á 90. mínútur, ég er stoltur af mínum mönnum.“

,,Við héldum áfram og fengum ferskar lappir inn. Þetta tekur á, það er örugglega kósý að sitja heima í stofu og horfa á leikinn en það tekur á að spila í svona veðri.“