Rúnar Kristinsson, þjálfari KR, var sáttur með sína menn í kvöld eftir leik við Breiðablik í Pepsi Max-deild karla í kvöld.

KR vann 2-0 heimasigur í toppslag deildarinnar og er nú með fjögurra stiga forskot í efsta sætinu.

,,Þetta var erfiður leikur, Blikar voru góðir og voru mikið með boltann en við vörðumst vel,“ sagði Rúnar við Stöð 2 Sport.

,,Við nýttum okkar færi og hefðum getað skorað fleiri mörk. Við fengum mun hættulegri færi en þeir, þeir dældu boltanum mikið í teiginn og við vörðumst vel.“

,,Við viljum auðvitað bjóða upp á góðan fótbolta en þetta var erfið rimma fyrir bæði lið. Við spilum ekkert sérstaklega vel og reyndum að loka á spil Blika sem við gerðum ágætlega. Á endanum snýst þetta um þrjú stig.“

Alex Freyr Hilmarsson fór meiddur af velli í leik kvöldsins og óttast Rúnar það versta. Alex virðist hafa orðið fyrir alvarlegum hnémeiðslum.

,,Alex Freyr fór á spítala og menn óttast það versta í hans tilfelli. Við vonum það besta en þetta lítur illa út fyrir kallgreyið.„