Eins og alþjóð veit hefur Rúrik Gíslason öðlast ótrúlegan fjölda nýrra fylgjenda á Instagram eftir leikinn gegn Argentínu á laugardag. Fylgjendur hans eru 364 þúsund þegar þetta er skrifað og fjölgar þeim með hverri mínútunni sem líður. Áður en að leiknum gegn Argentínu kom væru fylgjendurnir um 30 þúsund.

Rúrik ákvað að halda þessum nýju fylgjendum spenntum og birti hann nýja mynd af sér um ellefu leytið að íslenskum tíma. Á myndinni má sjá Rúrik í baráttunni við Lionel Messi, einn allra besta knattspyrnumann sögunnar. Aðdáendur Rúriks voru ekki lengi að taka við sér og tíu mínútum eftir að hún kom inn voru rúmlega átta þúsund fylgjendur hans búnir að setja „læk“ á hana.

Geri aðrir betur!

Við myndina segir Rúrik að frá því að hann sparkaði fyrst í bolta hafi draumur hans verið að spila fyrir þjóð sína á heimsmeistaramótinu. Sá draumur hafi loksins ræst á laugardag og reynslan verið ótrúleg. „Þetta var erfiður leikur gegn einu besta liði heims en við sýndum úr hverju við erum gerðir. Við erum lið og berjumst fyrir hvorn annan allt til enda.“

https://www.instagram.com/p/BkKdrqVAhPW/?taken-by=rurikgislason