Óttar Örn Sigurbergsson, framkvæmdastjóri ELKO, leggur til að tilskipun sem Evrópusambandið hefur innleitt verið sömuleiðis innleitt hér á landi. Tilskipunin á að koma í veg fyrir að fyrirtæki geti blekkt neytendur með því að hafa sömu vörur ítrekað á tilboði.
Þetta kemur fram í grein Óttars sem birt var í Fréttablaðinu í dag. Hann segir verslanir út um allan heim nota tilboð sem markaðstól en að þau geti þó verið varasöm.
„Fjöldi verslana hefur fallið í þá gryfju að vera ítrekað og með stuttu millibili með sömu vörur á tilboði og komnar í þá stöðu að viðskiptavinir kaupa bara á tilboðsdögum. Í slíkum tilvikum geta tilboð unnið á móti ímynd verslana og dregið úr trausti. Þarna er tilboðið hætt að vera tilboð, enda sömu vörur jafnvel vikulega á sama tilboði. Svona verðlagning blekkir neytendur.“
Þá útskýrir Óttar hvernig tilskipunin virkar: „Hún er ekki flókin: Hærra verðið (fyrra verðið í tilboðinu) á að vera lægsta verð vörunnar undangengna 30 daga.“
Afslátturinn reiknast þannig frá lægsta söluverði síðustu daga og með því er komið í veg fyrir að sama tilboðið sé notað ítrekað um hverja helgi. „Tilskipunin hefur ekki enn verið innleidd hér og þess má sums staðar sjá merki í framsetningu vöruverðs. Tilboðsmenning og traust til verslana kann því smám saman að bíða skaða án þess að við áttum okkur á því,“ segir hann.
Óttar segir að áralöng reynsla hans af smásöluverslun hafi gert honum ljóst að traust viðskiptavinanna sé „eitt það mikilvægasta sem fyritæki hafa.“
Hann segir ELKO hafa það sem meginreglu að auglýsa tilboð í takt við 30 daga tilskupun Evrópusambandsins. Það sé gert til að stemma stigu við tilboðsmenningu og að hagsmunir neytenda beri skaða af svoleiðis verðlagningu.
„Stórt skref var svo tekið þegar sett var í loftið verðsaga á vefsíðu elko.is þar sem viðskiptavinir geta séð verðbreytingar allra vara aftur í tímann. ELKO er fyrsta og eina verslunin á Íslandi sem stigið hefur þetta skref. Verðsagan hefur aukið gagnsæi í verðlagningu og verið jákvætt skref til framtíðar. ELKO gengur á undan með góðu fordæmi og viðleitni til að auka heiðarleika gagnvart viðskiptavinum. Best væri að 30 daga tilskipunin yrði innleidd sem fyrst.“
