Twitter-notandi sem kallar sig Agnar vekur athygli á ótrúlegu atriði á dósum af Ísey skyri, nánar tiltekið skyri með Crème brûlée-bragði.
„Já, það fer í taugarnar á mér að myndin á Ísey Skyr Crème brûlée líkist meira crème caramel en crème brûlée.“
Þegar skyrdollan er skoðuð kemur í ljós að Agnar hefur nokkuð til síns máls. Myndin á skyrdollunni líkist nefnilega frekar eftirréttnum Crème caramel, sem er búðingur sem er ávallt bakaður í litlum formum og síðan látinn renna úr forminu, sósaður í karamellusósu.
Já það fer í taugarnar á mér að myndin á Ísey Skyr Crème brûlée líkist meira crème caramel en crème brûlée pic.twitter.com/hMZRL3IPNY
— Agnar (@PartlyCheese) February 10, 2019
Crème brûlée er einnig búðingur sem er bakaður í litlum formum, en sá eftirréttur er hins vegar borinn fram í formunum þegar búið er að karamellisera sykur ofan á búðingnum þannig að hann brotnar þegar skeið er sett ofan í búðinginn til að njóta hans til hins ítrasta.
Þó Crème brûlée og Crème caramel líti út fyrir að vera mjög svipaðir þá felst munurinn á þessum tveimur eftirréttum í smáatriðunum. Í raun er sama tækni notuð til að búa báða búðingana til þó endaafurðin sé gerólík. Crème brûlée er saðsamari og þyngri eftirréttur. Hann er búinn til úr rjóma og eggjarauðum og er búðingur afar þykkur, og í raun andstæðan við viðkvæman sykurinn sem toppar hann.
Crème caramel er mun léttari og í hann eru notuð bæði heil egg og eggjarauður. Þá er rjóma skipt út fyrir mjólk.