Veitingastaðurinn HopCat, sem er að finna á sautján stöðum í Bandaríkjunum, hefur boðið upp á franskar á matseðli frá opnun fyrsta staðarins fyrir ellefu árum síðan. Það væri svo sem ekki í frásögur færandi nema fyrir þær sakir að franskarnar hafa verið kallaðar Crack Fries, eða krakkfranskar, með vísan í eiturlyfið krakk sem verður þúsundum að bana á ári hverju.
Mark Gray, framkvæmdastjóri BarFly Ventures, móðurfyrirtækis HopCat, tilkynnti það í myndbandi á YouTube í vikunni að nafni á frönskunum verði breytt, enda um misheppnaðan brandara að ræða.
„Eiturlyfjafíkn er ekki grín þó nafnið krakkfranskar hafi átt að vera kaldhæðnislegt grín,“ segir Mark. „Eiturlyfið krakk hefur rústað mörgum af þeim samfélögum sem við þjónustum.“
Verið er að endurhanna skilti og plaköt sem auglýstu krakkfranskarnar en nýtt nafn á frönskunum verður kynnt í janúar á næsta ári, áður en HopCat heldur sína árlegu frönsku kappátskeppni. Hins vegar mun uppskriftin að frönskunum haldast óbreytt. Food Network hefur sett frönskurnar í hóp tíu bestu franskanna í Bandaríkjunum og er rétturinn eitt helsta sérkenni staðarins.
„Við völdum nafnið fyrir rúmlega ellefu árum síðan til að vísa í hve ávanabindandi frönskurnar og piparkryddið á þeim væri, án þess að hugsa um þá sem eiturlyfið hefur haft neikvæð áhrif á,“ segir Mark einnig.