Sarah Palmer, 26 ára áströlsk kona, ákvað að panta sér mat á skyndibitastaðnum KFC í Sydney fyrir ekki svo löngu síðan, enda afar hrifin af matnum sem þar er á boðstólnum. Sarah og vinir hennar pöntuðu risa kjúklingaveislu og létu senda hana heim, en Söruh brá heldur betur í brún þegar hún byrjaði að gúffa kjúklingnum í sig.
Það sem blasti við henni var eitthvað sem leit út eins og heili og brá Sarah á það ráð að taka mynd af herlegheitunum og skrifa á Facebook-vegg KFC í Ástralíu. Sagt er frá málinu á vef Mirror.
„Hæ KFC. Ekki misskilja mig því ég er aðdáandi kjúklings frá KFC. Ég elska nagga jafn mikið og næsti maður en í dag þegar ég keypti það sem ég hélt að yrði fingrasleikjandi góður kjúklingur frá KFC reyndist hann líta út eins og heili mér til mikillar skelfingar,“ skrifar Sarah.
„Þetta er ekki innsláttarvilla. Já, ég meina heili, sem var grafinn undir dásamlega leynilegum kryddjurtum. Ímyndið ykkur hryllinginn, ógleðina og vonbrigðin. Ég vildi óska að þetta hefði ekki svona mikil áhrif á mig en þetta hefur breytt sambandi mínu við KFC til hins verra. Ég kynni vel að meta hugmyndir frá ykkur um hvernig við getum lagað sambandið okkar. Með djúpsteiktum kveðjum, Sarah,“ bætir hún við.
Svarið frá KFC var hins vegar langt því frá jafn hnyttið og einlægt og skrif Söruh.
„Hæ Sarah, takk fyrir skilaboðin. Mér finnst líklegra að þetta sé nýra en heili. Geturðu sent mér einkaskilaboð og sagt mér klukkan hvað þú pantaðir, hvaða máltíð þú pantaðir og símanúmer sem ég get náð í þig,“ skrifar starfsmaður KFC.
Einhverjir Facebook-notendur eru sammála starfsmanni KFC og einn bendir á að heilinn í kjúklingum sé á stærð við Maltesers-kúlu og því geti þetta ómögulega verið heili. Færsla Söruh hefur vakið gríðarlega athygli og hefur verið deilt rúmlega þúsund sinnum.