Það kannast eflaust flestir við að fella tár við laukskurð. Það getur verið ansi hvimleitt og oft meira táraflóð en þegar horft er á sorglega bíómynd. Auðvitað eru til ýmis ráð til að forðast þetta flóð, en hafið þið einhvern tímann velt því fyrir ykkur af hverju tárin streyma fram þegar að laukur er skorinn?

Tárin sem streyma fram þegar laukur er skorinn heita viðbragðstár. Samkvæmt vísindavefnum er þeim seytt sem viðbragð við ertingu eins og reyk og ryki til að vernda augun. Til að gera þetta nema skyntaugar í hornhimnunni ertinguna og berast boð um hana til heilastofnsins í kjölfarið. Þaðan berast síðan hormón til tárakirtla augnanna og valda seytingu tára sem skola ertandi efnið burt úr augunum.

Er við skerum lauk losnar ensím úr læðingi sem verður efnasamband sem heitir syn-propanethial-S-oxide. Þetta efnasamband kveikir á viðbragðstárunum þar sem líkaminn er að reyna að vernda sig gegn þessari efnaárás. Þess vegna grátum við þegar laukur er skorinn.

Þess má geta að talið er að hægt sé að byggja upp ónæmi gegn syn-propanethial-S-oxide en það gæti tekið ár og aldir. Þá má einnig minnast á að viðbragðstár eru ein af þremur gerðum af tárum sem líkaminn myndar. Hinar tegundirnar eru grunntár sem koma í veg fyrir að augun þorni upp og tilfinningatár sem tengjast tilfinningalífinu okkar.