Hið vinsæla Mars-súkkulaði gæti orðið ófáanlegt í Bretlandi ef allt fer á versta veg þegar að Bretland yfirgefur Evrópusambandið.
Þannig er mál með vexti að tvö af 21 hráefni sem þarf til að búa til Mars þarf að flytja inn til Bretlands og kemur skipið að höfn í Dover. Ef allt verður vitlaust út af Brexit verður óheimilt að flytja inn þessi hráefni í gegnum Dover og þá getur verksmiðja Mars í Slough ekki framleitt súkkulaðið.
Samkvæmt frétt Mirror hefur umhverfisráðherra Bretlands, Michael Gove, verið látinn vita af þessari hættu, en hráefnin tvö sem um ræðir skemmast á nokkrum dögum. Því þurfa þau að vera flutt til landsins hratt og örugglega.
Mars er gríðarlega vinsælt í Bretlandi og samkvæmt Mirror hafa súkkulaðiunnendur látið í sér heyra á Twitter. Eru þeir bæði hræddir um eftirlætis súkkulaðistykkið sitt en einnig áhyggjufullir yfir þeim sem vinna í verksmiðju Mars í Slough. Mars hefur hins vegar ekki tjáð sig um málið.