Teymi vísindamanna við sálfræðideild háskólans í Michigan birti nýlega rannsókn þar sem tuttugu mest ávanabindandi matvæli í heimi eru listuð upp. Vildi teymið reyna að skilja betur hvaða matvæli vekja upp fíkn í manneskjum.
Í rannsókninni var fylgst með 120 háskólanemendum en spurningalisti var einnig sendur á 384 aðra þátttakendur. Rannsóknin var í tveimur hlutum og í þeim fyrri tók fólk á aldrinum 18 til 23 ára þátt. Fólkinu var sýndur matur og beðið um að segja hvaða matur væri líklegur til að valda þeim vandræðum samkvæmt matarfíkniskala Yale, sem er vel þekktur. Þá kom í ljós að af þeim 35 matvælum sem þátttakendum var sýnd voru unnin matvæli, sem innihalda meiri fitu og meira magna af glúkósa, líklegri til að vera tengd við fíknihegðun.
Í seinni hlutanum voru þátttakendur á aldrinum 18 til 64 ára. Þá var notast við Likert-kvarðann, sálfræðiskala þar sem þátttakendur ákváðu hve sammála eða ósammála þeir voru vissum atriðum er varðaði 35 mismunandi matvæli. Þátttakendur gátu gefið matvælum einkunn frá 1 og upp í 7, en matvæli sem fengu 7 voru talin valda mestu vandræðum eða vera mest ávanabindandi.
Þegar niðurstöður úr þessum tveimur hlutum voru teknar saman gátu vísindamenn ákvarðað hvaða tuttugu matvæli væru mest ávanabindandi í heimi. Hér fyrir neðan er listinn, en fyrst á listanum er sá matur sem er mest ávanabindandi og svo koll af kolli. Það kemur líklegast ekki á óvart að ekki er um heilsufæði að ræða.
• Pítsa
• Súkkulaði
• Snakk
• Smákökur
• Ís
• Franskar
• Ostborgari
• Gosdrykkir
• Kökur
• Ostur
• Beikon
• Djúpsteiktur kjúklingur
• Rúnnstykki
• Smjörpopp
• Morgunkorn
• Hlaup
• Steik
• Möffins
• Hnetur
• Egg