Klukkan hálfþrjú í nótt var tilkynnt um rán við Fjarðarhraun í Hafnarfirði. Ráðist var á mann, hann kýldur ítrekað, honum ógnað með eggvopni og hann rændur peningum sem hann hafði á sér. Árásarmennirnir fóru af vettvangi í bíl og er þeirra leitað.
Þetta kemur fram í dagbók lögreglunnar. Þar segir einnig frá manni í annarlegu ástandi sem handtekinn var á Reykjanesbraut við Miklubraut. Maðurinn hafði verið að reyna að ganga í veg fyrir umferð bíla. Var hann vistaður sökum ástands síns í fangageymslu lögreglu.
Aðrar tilkynningar í dagbókinni snerta akstur manna undir áhrifum fíkniefna eða áfengis og hafði lögregla afskipti af mörgum aðilum vegna slíkra mála í nótt.
